Act 9 | WSK | STEP | Bare tom mu te Saul Jesus ko olekem nunga menawurokko am ninguru den balukaso, wuli kelagakaso. Ale nu Priest Supuling kote namaram,

Acts 9

Saul giris palagam

1 Bare tom mu te Saul Jesus ko olekem nunga menawurokko am ninguru den balukaso, wuli kelagakaso. Ale nu Priest Supuling kote namaram, 2 ale maonam, se Priest Supuling tam gawa sang bataguru tuam, Saul synagogue Damascus anikasan mu nunga supuling nungarukko. Tam gawa te den iwita balam, “Kariimet,” mam, “Jesus ko Munan ^{▼▼Acts 9:2 Jesus ko Munan mu English den te “the Way”: 19:9,23; 22:4; 24:14,22.} karowomon se Saul nungarkuk, mu nu nunga talipuruk ale arungak Jerusalem tairukko.”

3 Se Saul aolak iluwam nama Damascus pingi aratuwaram se tairate duruk wonong ko nikitang biyala nu taluru gurugam. 4 Se nu aliti dagulam, ale den bo iwita nu manarukaso mu ikiam, “Saul, Saul,” mam, “ni awuk se aninga maguwuwasam a?” mam.

5 Se Saul balam, “Kari Biya, ni awiri ya?”

Se nu balam, “Ani Jesus,” mam, “ni aga bita maguwuwasam wore,” mam. 6 “Bare bares, wonong ningi kasu nagur ale kari bo mel i baluk mu ni am bitarko.”

7 Se kari Saul ilak namawaman mu biririkiman ale sanamaman, den ito balmonko mena. Nuna den nirung bo ikiman, bare bo me aringiman. 8 Se Saul barasam ale motam pauk palagam, bare motam mel bo me arikaso. Se nuna kuting te iluman ale ilak Damascus kasu naguman. 9 Nu tom ilagala suwan ko tiromorom iram se bagakaso, ale na yu bo me nokaso.

10 Jesus ko olekem bo Damascus bagakaso, ko nup Ananias. Se ipingira te Kari Biya nu auram ale maonam, “Ananias!” mam. Se nu balam, “Kari Biya, ani bagasam iweya.”

11 Se Kari Biya nu maonam, “Ni bares ale lage ko nup Diram masan mu te nama Judas ko kawam te arage ale Tarsus wonong ko kari bo, ko nup Saul, mu ko isaruko. Nu ngatanga se bagoso. 12 Nu ipingira te kari bo ko nup Ananias, nigita, kote kasu nagurem ale te loagurukko kiting supuling te beterem mu arigam ale bolta bagoso.”

13 Bare Ananias iwita balam, “Kari Biya,” mam, “ani kariimet suen biya kari mu kilek memek nika kariimet Jerusalem bagasan mu nungumik te beteso mu ko balsan se ani ikisam. 14 Nu priest bibiya nongote kariimet nika aru ngatangorsan mu nunga iluwok nunga talipurukko sokel tam.”

15 Bare Kari Biya iwita Ananias maonam, “Ni am namarko. Kari mu aninga ura kari. Ani maingkala balem se bagoso. Nu aninga aip giok ale ago kariimet sang Juda mena wore nongote namurukko balem. Ale king nongote, se Israel ningi agotala namurukko balem. 16 Nu aninga aip giok ago geraguk mu te ikup memek suen biya giokko mu ani kausek se arigokko.” ^{▼▼Acts 9:15-16 Paul king nomokete: Acts 25:23; 27:24. Paul ikup gikaso: 2 Cor 11:23-28.}

17 Se Ananias namaram kawam ningi kasu naguram, ale ko kuting Saul ko supuling te beteram, ale maonam, “Aga bo Saul,” mam, “Kari Biya Jesus lage te kete aratam borta ni aking loager ale Korang Bur kimik ago terong maukko aninga maonam se kete tairem,” mam. 18 Se tairate mel turuturuk kuriring iwita Saul motam kalowaram mu kapa saparam, se nu aking loagakaso sor arikaso. Asele barasam ale anuwa tam. 19 Ale na nam ale sokel tam.

Saul Damascus ningi den gilalong yawara apukaso

Saul tom sang olekem arungak Damascus bagakaso. 20 Nu tairatela barasam ale Juda nunga synagogue te geragakaso ale den balukaso, “Jesus borta Kaem ko Namar,” makaso. 21 Se kariimet noko den ikiman mu suen la biririkiman, ale balukasan, “Kari ewerta Jerusalem geragakaso ale kariimet nup umutang te ngatangawakasan mu nunga bita maguwukaso agila pa! Ale aitak imi te tairam mu saki nunga talipuruk ale priest bibiya nongote arungu namurukko!” 22 Bare Saul ko sokel ura te bitirukko mu biyala kote taikaso. Se nu Juda alo Damascus bagaman mu ninguru nunga kasurukaso Jesus mu Kristus. Se nuna den bo balmonko mena.

23 Tom maiya nuam namaram, se Juda alo biguwuman ale Saul momon se kuerukko den nungurman, 24 bare Saul mu ko den ikiam. Turom woremkalal Juda alo nu momonko lage korang bitarukasan. 25 Bare Saul ko singsang turom taiman ilak namaman, ale wonong ko kar mu te ilak tarigiman, se korokem ningi daigam se mayang te kaloman ale beteman se wonong buring ko nama kaparam.

Saul Jerusalem namaram bagakaso

26 Saul Jerusalem namaram ale Kris alo arungu biguwurokko ago kaeyakaso. Bare nuna nu ko nguangakasan. Mu awuk, nuna nu nunguningta Jesus ko olekem aram mu ko nongomang ningi me nunguning akaso. 27 Bare Barnabas Saul tam ale ilak apostle nongote namaram. Ale nunga maonam, “Saul lage te namawa Kari Biya arigam, se Kari Biya nu ilak munakaram,” mam. “Ale balam, nu Damascus ningi Jesus nup te den sokel ago balukaso,” mam. 28 Asele Saul arungak baga se Jerusalem ningi, Kari Biya nup te, den sokel ago balu balu geragakaso. 29 Ale nu Juda alo Greek den te munakakasan mu arungak den te numi ilukaso. Se ko nuna nu am momon se kuerukko kaeyakasan. 30 Se Kris alo mel mu ko den ikiman mu nuna Saul taman ilak Caesarea namaman, ale beteman se Tarsus namaram.

31 Se tom mu te Judea, Galilee, Samaria sor ningi nuna Kris alo mu me nunga bita maguwukasan, se yawarakala bagakasan ale sokel tokasan. Nuna Kari Biya kuring bowa ningi bagakasan, se Korang Bur nongomang motam sokel tuikaso. Se kariimet suen biya Kristus ko nongomang ningi nunguning akaso se nama suena gilingikasan.

Peter Aeneas nungam

32 Peter sor suen biya te geragakaso. Ale tom bo Lydda namaram ale Kaem ko kariimet arungak bagakaso. 33 Wonong mu te nu kari tilital bo arigam, ko nup Aeneas, yar 8 ningi nu am anira la bagakaso. 34 Se Peter nu maonam, “Aeneas,” mam, “Jesus Kristus aitakta ka nungurso se nungesam. Bares ale ka kiwim sor nunguruko,” mam. Se tairatela nu barasam. 35 Se Lydda se Sharon wonong ko kariimet suen la nu ari gilingiman, ale nongomang gurugu Kari Biya tuman.

Peter Tabitha mumam se barasam

36 Joppa wonong te Kris imet bo bagakaso, ko nup Tabitha, Greek den te Dorcas masan. ^{▼▼Acts 9:36 Tabitha, Dorcas: nup ilagala imitang ko nunguning mu English den te “gazelle” masan. Mu deer duap bo ko nup.} Nu tom suen biya kilek ningo ningo bitakaso, ale kariimet nungumik mel mena mu nunga sangarukaso. 37 Tom mu te nu kuera tam, ale kueram. Se nuna ko kumik guang anuman, ale patawu kuwim bo kualala mu te ilak araga beteman. 38 Lydda wonong mu Joppa ko pingita. Se olekem alo Peter Lydda bagoso mu ko den iki gilingiman, ale kari ilagala nunga manorman se kote namaman ale manorman, “Ni tairate ana nangarak tairko!” maman.

39 Se Peter arungak namaram. Nu nama aratam mu nuna ilak kuwim kualala mu te tarigiman. Se imet suen biya, nunga nugari kueman, mu Peter kumik duap te sanamaman ale nia se bagakasan. Ale guang duap duap imet Dorcas mu nu tom marak arungak baga se biriram mu Peter kasurukasan.

40 Bare Peter suen la nunga kaoram se watingi arataman, asele nu bugura kulukuam ale Kaem aru ngatongam. Ale koma gurugu imet kueram mu tuam, ale balam, “Tabitha, baresko!” mam. Se imet mu motam pauk palagam, ale Peter arigam ale barasu daigam. 41 Se Peter kuting te iluwam ale patowaram se barasu sanamaram. Asele Peter Kris alo, se imet nugari kuera, mu nunga auram se taiman, se imet maragaram mu nungaram.

42 Se den mu pagam Joppa wonong ningi geraga saparam. Se kariimet suen biya Kari Biya ko nongomang ningi nunguning aram. 43 Se Peter tom maiya nuam Joppa bagakaso. Nu kari bo nup Simon, nu bulmakau guang nunga ko kari, mu ilak bagakaso.